Plantun de Prouvènço

Pèr coumpara dos planto d'encò nostre

Helianthemum salicifolium & Rumex patientia

Helianthemum salicifolium

Cistaceae

Nom en français : Hélianthème à feuilles de saule.

Descripcioun :
Es uno di dos massugueto de Prouvènço (emé Helianthemum ledifolium) que fai pas de ligno. La massugueto-di-fueio-de-sause es uno erbo de l'an que flouris soulamen lou matin d'ouro. Es pèr acò se vèi pas gaire alor qu'èi pamens coumuno. Se recounèis peréu que se tèn bèn drecho, li fueio soun óuvalo emé de costo que se vèson bèn, e pourtado pèr un pichot pecou.

Usanço :
Li massugueto èron acampado en Espagno pèr la farmacìo tradiciounalo e soun couneigudo pèr lucha contro li microbe (poulifenol).

Port : Erbo
Taio : 3 à 30 cm
Fueio : óupousado
Tipe bioulougico : Teroufite
Cicle bioulougico : Planto de l'an

Gènre : Helianthemum
Famiho : Cistaceae

Ordre : Malvales

Coulour de la flour : Jauno
Petalo : 5
Ø (o loungour) flour : Pancaro entresigna
Flourido : Printèms

Sòu : Ca
Autour basso e auto : 0 à 700 m
Aparado : Noun

Liò : Garrigo - Tepiero seco
Estànci : Termoumediterran à Mountagnard
Couroulougi : Pancaro entresigna
Ref. sc. : Helianthemum salicifolium (L.) Mill., 1768

Paciènci-di-mouine

Rumex patientia

Polygonaceae

Àutri noum : Fueio-aigro, Paciènci.

Noms en français : Oseille-épinard, Patience des moines.

Descripcioun :
La paciènci-di-mouine, o peréu noumado fueio-aigro, s'atrobo pu gaire, alor qu'èro proun cultivado à passa tèms. Trachis en group proche d'oustau o dins d'ùnis ermas. Se recounèis à si gràndi fueio en lanço, en couor à la baso e pounchudo. L'enflourejado èi fournido, pourtado pèr de ramo drecho.

Usanço :
La paciènci es uno planto que s'adoubo en tian o en meleto coume d'espinarc-fèr o sangàri. Pamens fau pas trop n'en manja malodi l'acide óussali. La racino èi vertuouso contro li mau de péu (en emplastre), recouneigudo coume tounico e contro lou quiéu tapa.